Хурлын хуралдааны мэдээлэл

Орхон аймгийн ИТХ-ын ээлжит бус XIII хуралдаан өнөөдөр /2023.11.08/ хуралдаж таван асуудлыг хэлэлцэн баталлаа. Тодруулбал, Орхон аймагт 2024 онд цэргийн дүйцүүлэх алба хаах иргэдийн тоог 20, 2024 онд ойгоос бэлтгэх модны дээд хэмжээг ойн цэвэрлэгээний ажлаар хэрэглээний хуурай шинэс мод 100 шоо метр, түлээний шинэс мод 800 шоо метр байхаар баталлаа. Мөн өөрийн эзэмшиж буй газраа өмчлөх хүсэлт гаргасан 449 иргэнд 32,42 га газрыг өмчлүүлэх байршил хэмжээг баталсан юм.

Аймгийн ИТХ-ын ээлжит бус 12 дугаар хуралдаан өнөөдөр цахимаар хуралдаж аймгийн 2023 оны төсөвт зохицуулалт хийлээ. 2023 оны 7 дугаар сард баталсан аймгийн 2023 төсвийн тодотголд Эко хорооллын дулаан хангамжийн шугам сүлжээг хэсэгчлэн солих ажил, 20-р сургуулийн гадна суурилуулсан дулааны узельд барилга барих ажил туссан. Тухайн хоёр ажилд тендер зарласан боловч шаардлага хангасан оролцогч байгаагүйгээс дахин тендер зарлах болжээ. Эдгээр ажлууд нь 2023-2024 оны өвөлжилтийн бэлтгэл хангах ажлын хүрээнд яаралтай шийдвэрлэх шаардлагатай тул ийнхүү хурлын хуралдаанаар хэлэлцүүллээ.

Аймгийн ИТХ-ын ээлжит 16 дугаар хуралдаанаар Эрдэнэт хотын болон Хөдөө аж ахуйн өвөлжилтийн бэлтгэл ажлын явцын талаар хэлэлцэж, төлөвлөгөөнд туссан ажлыг эрчимжүүлэх, ажил эрчимжүүлэх чиглэлээр хийж хэрэгжүүлсэн ажлаа 10 дугаар сарын 15-ны өдөр хуралдах аймгийн ИТХ-ын зөвлөлийн хуралдаанд танилцуулахыг аймгийн Засаг дарга С.Батжаргалд даалгалаа.

Аймгийн ИТХ-ын ээлжит бус XI хуралдаан өнөөдөр хуралдаж, Орон нутгийн өмчийн үндсэн хөрөнгийн 2022 оны жилийн эцсийн дүнг таван зуун дөчин найман тэрбум нэг зуун тавин хоёр сая төгрөгөөр баталлаа.

Орхон аймгийн ИТХ-ын ээлжит бус X хуралдаанаар аймгийн 2022 оны төсвийн орлогын гүйцэтгэлийг 176,7 тэрбум, зарлагын гүйцэтгэлийг 168,1 тэрбум төсвийн хэмнэлтийг 11,2 тэрбум төгрөг, давсан орлогыг 16 тэрбум төгрөгөөр тус тус баталлаа.

Орхон аймгийн ИТХ-ын Ээлжит бус X хуралдаанаар аймгийн баяр наадмын хорооны даргаар аймгийн ЗДТГ-ын дарга Ш.Ганболд, нарийн бичгийн даргаар аймгийн цэргийн штабын дарга Б.Оюунтүлхүүр болон 26 гишүүний бүрэлдэхүүнтэйгээр ажиллахаар баяр наадмын хорооны бүрэлдэхүүнийг баталлаа. Мөн наадам зохион байгуулахад орон нутгийн төсвөөс 200 сая, Эрдэнэт үйлдвэртэй хамтран ажиллах төлөвлөгөөний зардлаас 219 сая төгрөгийг зарцуулахаар зардлын задаргааг баталсан юм.

Орхон аймгийн ИТХ-ын ээлжит IX хуралдаанаар Иргэний зөвлөлийн зарим гишүүнийг чөлөөлж, томилох тухай, Бүрэлдэхүүнд нэмэлт өөрчлөлт оруулах тухай асуудлуудыг хэлэлцлээ.

Орхон аймгийн Хөдөө аж ахуйн салбарын өвөлжилт, хаваржилтын бэлтгэл хангах ажлын төлөвлөгөөг мал аж ахуйн өвөлжилт, мал эмнэлгийн ажил үйлчилгээ, газар тариалангийн бэлтгэл хангах, хүнсний чиглэлээр гэсэн 4 бүлэгт 32 арга хэмжээг хэрэгжүүлэхээр аймгийн ИТХ-ын ээлжит XV хуралдаанаар баталлаа.

Аймгийн ИТХ-ын ээлжит XV хуралдаанаар Эрдэнэт хотын 2023-2024 оны өвөлжилтийн бэлтгэл ажилд 49 нэр төрлийн ажил төлөвлөснөөс 15 ажлыг гадаадын зээл, улс, орон нутгийн төсвийн 95,4 тэрбум төгрөгийн хөрөнгө оруулалтаар, 20 нэр төрлийн ажлыг тухайн хангагч байгууллагын 47,1 тэрбум төгрөгийн хөрөнгөөр хийж гүйцэтгэхээр төлөвлөж төлөвлөгөөг баталлаа.